وفاقی وزارت تعلیم کے محکمے فیڈرل ڈائریکٹوریٹ آف ایجوکیشن (ایف ڈی ای) نے اپنے تحت چلنے والے تمام تعلیمی اداروں میں موسم بہار کی تعطیلات کے شیڈول میں تبدیلی کردی ہے۔
سرکاری نوٹیفکیشن کے مطابق ایف ڈی ای کے زیر انتظام اسکولوں اور کالجوں میں موسم بہار کی تعطیلات رمضان کے آخری ہفتے یعنی 17 سے 20 اپریل تک منائی جائیں گی۔
پانچویں اور آٹھویں جماعت کے سالانہ امتحانات کی پیپر مارکنگ، داخلہ/ رجسٹریشن کے عمل اور ایس ایس سی اور ایچ ایس ایس سی کے پری بورڈ امتحانات سے متعلق ترجیحی کاموں کی وجہ سے شیڈول میں تبدیلی کی گئی ہے۔
واضح رہے کہ ایف ڈی ای کے زیر انتظام تعلیمی اداروں میں طلباء کو عید الفطر کی تعطیلات میں توسیع دی جائے گی جو 21 یا 22 اپریل کو پڑنے کا امکان ہے۔