اسلام آباد: وزیر دفاع خواجہ آصف شنگھائی تعاون تنظیم (ایس سی او) کے وزرائے دفاع کے اجلاس میں ورچوئل شرکت کریں گے۔
خواجہ آصف ویڈیو لنک کے ذریعے شنگھائی تعاون تنظیم کے دو روزہ اجلاس میں شرکت کریں گے۔ یہ دو روزہ اجتماع کل (27 اپریل) سے نئی دہلی میں شروع ہوگا۔
گلوبل ٹائمز کی رپورٹ کے مطابق چین کے وزیر دفاع لی شانگ فو اس اجلاس میں شرکت کے لئے ہندوستان کا پہلا دورہ کریں گے۔
چینی وزارت دفاع کے مطابق لی جمعرات سے جمعہ تک شنگھائی تعاون تنظیم کے اجلاس میں شرکت کریں گے اور تقریر کریں گے اور دیگر ممالک کے وفود کے سربراہان سے ملاقات کریں گے۔ روسی وزیر دفاع بھی تقریب میں شرکت کریں گے۔
شنگھائی تعاون تنظیم کے وزرائے دفاع کے اجلاس میں رکن ممالک کے علاوہ دو مبصر ممالک بیلاروس اور ایران بھی شرکت کریں گے۔
رپورٹ کے مطابق بھارتی وزیر دفاع راج ناتھ سنگھ اس موقع پر شریک ممالک کے اپنے ہم منصبوں سے دو طرفہ ملاقاتیں کریں گے۔ وہ علاقائی امن و سلامتی، شنگھائی تعاون تنظیم میں انسداد دہشت گردی کی کوششوں اور موثر کثیرالجہتی امور پر تبادلہ خیال کریں گے۔
خواجہ آصف نے علاقائی کانفرنس میں ورچوئل شرکت کا فیصلہ کیا ہے لیکن ان کے ساتھی وزیر خارجہ بلاول بھٹو 4 سے 5 مئی تک گوا میں ہونے والے شنگھائی تعاون تنظیم کے وزرائے خارجہ کے اجلاس میں شرکت کریں گے۔
یہ 2011 کے بعد کسی پاکستانی وزیر خارجہ کا ہندوستان کا پہلا دورہ ہوگا۔
شنگھائی تعاون تنظیم ایک کثیر القومی گروپ ہے جس کی بنیاد 2001 میں رکھی گئی تھی۔ چین، کرغزستان، پاکستان، روس، تاجکستان، ازبکستان اور بھارت اس کے رکن ہیں۔