اسلام آباد(ڈیلی پاکستان آن لائن)وفاقی وزیر خزانہ اسحاق ڈار عالمی مالیاتی فنڈ (آئی ایم ایف) اور عالمی بینک کے موسم بہار کے سالانہ اجلاس میں شرکت کے لیے 10 سے 16 اپریل تک امریکا کا دورہ کریں گے۔
وزارت خزانہ کے ذرائع کا کہنا ہے کہ سیکرٹری خزانہ حامد یعقوب اور گورنر اسٹیٹ بینک جمیل احمد بھی وزیر خزانہ کے ہمراہ ہوں گے۔
ذرائع کا کہنا ہے کہ وفد دورے کے دوران آئی ایم ایف حکام سے علیحدہ ملاقات کرے گا۔
وزیر خزانہ بین الاقوامی قرض دینے والے اداروں کو حکومت کی جانب سے متعارف کرائی گئی اصلاحات سے آگاہ کریں گے۔
بین الاقوامی مالیاتی فنڈ (آئی ایم ایف) اور بریٹن ووڈ انسٹی ٹیوشنز کے نام سے مشہور عالمی بینک کو بھی معاشی نظم و ضبط اور دوست ممالک سے فنڈنگ کی کوششوں میں پیش رفت کے بارے میں بریفنگ دی جائے گی۔
آئی ایم ایف سعودی عرب، متحدہ عرب امارات اور قطر جیسے دوست ممالک سے پاکستان کو 6 ارب ڈالر کی اضافی امداد کی تصدیق طلب کر رہا ہے۔
مخلوط حکومت پہلے ہی کہہ چکی ہے کہ اس نے بین الاقوامی مالیاتی فنڈ (آئی ایم ایف) کی جانب سے 1.1 ارب ڈالر کی قسط جاری کرنے کے لیے مقرر کردہ تمام سخت ترین شرائط پوری کر دی ہیں۔