لاہور:(پاک آنلائن نیوز) پاکستان مسلم لیگ (ن) کی چیف آرگنائزر مریم نواز نے پاکستان تحریک انصاف (پی ٹی آئی) کے چیئرمین عمران خان کو شدید تنقید کا نشانہ بناتے ہوئے کہا ہے کہ انتخابات اکتوبر میں ہوں گے۔
لاہور میں مزدوروں کے عالمی دن کے حوالے سے منعقدہ تقریب سے خطاب کرتے ہوئے مسلم لیگ (ن) کی رہنما مریم نواز کا کہنا تھا کہ عمران خان کا اسمبلیاں تحلیل کرنے کا منصوبہ ناکام ہوگیا ہے اور اکتوبر میں انتخابات ہوں گے۔
مسلم لیگ (ن) کے رہنما نے پی ٹی آئی قیادت کو تنقید کا نشانہ بناتے ہوئے کہا کہ موجودہ صورتحال صرف عمران خان کی نہیں بلکہ ان کی پوری ٹیم کی ہے، انہوں نے مزید کہا کہ 'عمران خان کا گینگ' بدعنوان ترین افراد پر مشتمل ہے۔
سابق چیف جسٹس ثاقب نثار کے بیٹے کی حالیہ آڈیو لیک کی جانب اشارہ کرتے ہوئے انہوں نے کہا کہ نواز شریف کو نااہل قرار دینے کا ذمہ دار ان کا بیٹا پارٹی ٹکٹ کے لیے ایک کروڑ 20 لاکھ روپے کی رشوت لیتے ہوئے پکڑا گیا۔
انہوں نے کہا کہ آپ نے انتخابی ٹکٹ کی فراہمی کے لیے ایک کروڑ 20 لاکھ روپے کا مطالبہ کیا، نواز شریف کو نااہل قرار دینے کے لیے آپ نے کتنی رقم لی؟
انہوں نے کہا کہ کم از کم اجرت 40 ہزار روپے مقرر کی جائے کیونکہ مزدوروں کی محنت سے پاکستان ترقی کر رہا ہے، اتنے مضبوط لیبر ونگ والی پارٹی کو شکست نہیں دی جا سکتی۔
مریم نواز نے کم از کم اجرت مقرر کرنے کے وزیراعظم کے اقدام کو سراہتے ہوئے کہا کہ وزیراعظم نے ان مشکل معاشی حالات میں کم از کم اجرت 35 ہزار روپے مقرر کی ہے لیکن مزدوروں کی کم از کم اجرت 40 ہزار روپے مقرر کی جانی چاہیے۔
انہوں نے کہا کہ پاکستانی شہری بیرون ی ممالک میں جانفشانی سے کام کر رہے ہیں لیکن پاکستان میں اتنی صلاحیت ہے کہ مزدوروں کو بیرون ملک جانے کی ضرورت نہیں ہے۔