سابق کپتان مصباح الحق ٹی ٹین گلوبل اسپورٹس کی جانب سے امریکا کے شہر ٹیکساس کے شہر ڈیلاس میں شروع کی جانے والی ماسٹرز ٹی 10 لیگ کے افتتاحی ایڈیشن میں شرکت کریں گے۔
افتتاحی تقریب میں مصباح الحق کے علاوہ نیوزی لینڈ کے سابق کرکٹر کوری اینڈرسن اور ویسٹ انڈیز کے لیجنڈری بلے باز شیو نارائن چندرپال نے بھی شرکت کی۔
تقریب کے دوران مصباح الحق نے خوشی کا اظہار کرتے ہوئے کہا کہ ٹی 10 فارمیٹ میں دنیا بھر کے سابق کرکٹرز اور ابھرتے ہوئے کھلاڑیوں کے ساتھ کھیلنا اعزاز کی بات ہے۔
انہوں نے کہا کہ امریکہ میں خاص طور پر اس عمر میں اس فارمیٹ کا حصہ بننا بہت بڑا اعزاز ہے۔ ہر کوئی چاہتا ہے کہ عمر رسیدہ کھلاڑی دوبارہ کھیلیں اور مجھے یقین ہے کہ یو ایس ماسٹرز ٹی 10 کامیاب ہوگا۔
امریکا میں کھیلی جانے والی اس لیگ کا افتتاح ابوظہبی ٹی 10 کے منتظمین نے امریکا میں قائم سیمپ آرمی کرکٹ فرنچائز کے تعاون سے کیا ہے۔
ٹورنامنٹ میں مجموعی طور پر چھ ٹیمیں 10 اوورز کے فارمیٹ میں چیمپیئن شپ کے لئے کھیلیں گی۔ لیگ میں ابھرتے ہوئے ٹیلنٹ کے ساتھ لیجنڈری کرکٹرز بھی کھیلیں گے۔
سامپ آرمی کرکٹ فرنچائز کے مالک رتیش پٹیل نے کرکٹ شائقین کے لئے امریکہ میں تیز رفتار اور دھماکہ خیز کرکٹ فارمیٹ لانے کے لئے اپنے جوش و خروش کا اظہار کیا۔
انہوں نے مزید کہا کہ لیگ میں حصہ لینے والے کھلاڑیوں کی بڑی تعداد ہے اور یہ امریکی شائقین کے لیے امریکی سرزمین پر پہلی بار اسے دیکھنے کا بہترین موقع ہے۔