راولپنڈی(ڈیلی پاکستان آن لائن)آرمی چیف جنرل عاصم منیر نے پاک فوج کے شہداء اور سابق فوجیوں کو ان کی بہادری اور آپریشنز کے دوران قوم کے لئے شاندار خدمات پر ملٹری ایوارڈز سے نوازا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق جی ایچ کیو میں شہدا اور سابق فوجیوں کے اعزاز میں تقریب تقسیم کی گئی۔
آرمی چیف نے دشمن عناصر کے خلاف مختلف آپریشنز کے دوران بہادری اور قوم کے لئے شاندار خدمات انجام دینے پر پاک فوج کے افسران اور جوانوں کو ملٹری ایوارڈز سے نوازا۔
تقریبا 51 افسران کو تمغہ امتیاز ملٹری، 22 افسران اور جوانوں کو تمغہ بسالت اور دو جوانوں کو اقوام متحدہ کے خصوصی تمغے سے نوازا گیا۔
تقریب میں پاک فوج کے سینئر افسران اور شہدا کے اہل خانہ کی بڑی تعداد نے شرکت کی۔
اس موقع پر آرمی چیف جنرل عاصم منیر نے کہا کہ قوم اپنے شہداء کی عظیم قربانیوں کی وجہ سے آزاد ماحول میں رہ رہی ہے۔
آرمی چیف نے کہا کہ بلاشبہ ہم شہدا کے احساس فرض اور عظیم قربانیوں کی وجہ سے آزاد ماحول میں رہ رہے ہیں۔
انہوں نے کہا کہ شہدا کی قربانیاں اور غازیوں کی خدمات مسلح افواج کا قیمتی اثاثہ اور فخر کا سرمایہ ہیں۔ پاک فوج ایک ادارے کی حیثیت سے ہمیشہ اس سے وابستہ ہر فرد اور ان کے اہل خانہ کو یاد کرتی ہے اور ایک خاندان کی حیثیت سے اس کا رشتہ قابل فخر اور مثالی تھا۔
آرمی چیف نے کہا کہ پاک فوج کا ہر سپاہی اور افسر علاقائی، لسانی اور سیاسی تعصبات اور امتیازات سے بالاتر ہو کر اپنے فرائض اور ذمہ داریوں کو اولیت دیتا ہے۔ ایک مضبوط فوج ملک کی سلامتی اور اتحاد کی ضمانت دیتی ہے۔