وفاقی وزیر اطلاعات و نشریات مریم اورنگزیب نے کہا ہے کہ پاکستان تحریک انصاف (پی ٹی آئی) کے چیئرمین عمران خان نے ملک بھر میں سرکاری تنصیبات پر حملوں کی منصوبہ بندی کی۔
اسلام آباد میں پریس کانفرنس کرتے ہوئے مریم اورنگزیب کا کہنا تھا کہ مسلح مظاہرین نے شہدا کی یادگاروں کو تباہ کیا۔ انہوں نے کہا کہ پی ٹی آئی کے پانچ سے چھ رہنماؤں نے مظاہرین کو سرکاری عمارتوں اور تنصیبات میں توڑ پھوڑ کرنے کی رہنمائی کی۔ یہاں تک کہ جی ایچ کیو اور کور کمانڈر ہاؤس کو بھی نشانہ بنایا گیا۔
وفاقی وزیر نے کہا کہ عمران خان کی جانب سے واقعے کی مذمت اپنے جرائم چھپانے کے لیے کی گئی ہے۔
مریم اورنگزیب نے کہا کہ توڑ پھوڑ میں ملوث افراد لاہور میں عمران خان کی زمان پارک رہائش گاہ پر چھپے ہوئے ہیں۔ انہوں نے کہا کہ انہوں نے زمان پارک میں 14 ماہ تک حملے کی منصوبہ بندی کی۔
انہوں نے کہا کہ عمران خان نے اپنی آج کی ٹویٹ میں انسانی حقوق کی خلاف ورزیوں کو ظاہر کرنے کے لئے مصنوعی ذہانت سے تیار کردہ تصویر کا استعمال کیا۔ عمران خان پروپیگنڈے کے لیے جعلی تصاویر استعمال کر رہے ہیں۔
وفاقی وزیر نے کہا کہ 9 مئی کے واقعات کے بعد ملک بھر میں لوگوں نے پی ٹی آئی چھوڑنا شروع کر دی ہے۔
انہوں نے کہا کہ پی ٹی آئی کے مظاہرین نے ریڈیو پاکستان کی عمارت کو آگ لگا دی اور آرکائیوز کو تباہ کردیا۔ انہوں نے کہا کہ ریڈیو پاکستان کو 250 ملین روپے کا نقصان ہوا ہے۔ انہوں نے کہا کہ اگر پی ٹی وی حملے کے مجرموں کو سزا دی جاتی تو وہ ریڈیو پاکستان میں توڑ پھوڑ نہ کرتے۔
ایک سوال کے جواب میں انہوں نے کہا کہ ریڈیو پاکستان، پی ٹی وی اور انفارمیشن سروسز کی اکیڈمیوں کو مربوط کیا جا رہا ہے تاکہ نوجوان پروفیشنلز کو میڈیا کے شعبے میں تربیت دی جا سکے۔ انہوں نے کہا کہ انضمام کا عمل جون تک مکمل ہوجائے گا۔