اسلام آباد(ڈیلی پاکستان آن لائن)پاکستان پیپلز پارٹی (پی پی پی) نے پاکستان تحریک انصاف (پی ٹی آئی) کے چیئرمین عمران خان کو قانونی نوٹس بھیجنے کا اعلان کردیا۔
پیپلز پارٹی کے رہنما فرحت اللہ بابر، نیئر بخاری اور قمر زمان کائرہ نے مشترکہ پریس کانفرنس کرتے ہوئے عمران خان کو تنقید کا نشانہ بنایا۔
پیپلز پارٹی کے رہنماؤں کا کہنا تھا کہ سابق وزیراعظم اپنا ذہن کھو چکے ہیں اور پارٹی ان سے ان کے الزامات واپس لینے کا مطالبہ کرتے ہوئے قانونی نوٹس جاری کرے گی۔
انہوں نے اعلان کیا کہ اگر الزامات واپس نہ لیے گئے تو عمران خان کے خلاف قانونی جنگ شروع کی جائے گی۔
پاکستان پیپلز پارٹی (پی پی پی) کے سینئر رہنما نیئر بخاری نے کہا ہے کہ عمران خان نے سیاست میں خود کو متعلقہ رکھنے کے لیے زرداری کے خلاف عجیب و غریب دعوے کیے، اس بار پی ٹی آئی سربراہ کی جانب سے لگائے گئے الزامات کافی سنجیدہ ہیں اور ان کا سخت جواب دیا جائے گا۔
پریس کانفرنس سے خطاب کرتے ہوئے قمر زمان کائرہ کا کہنا تھا کہ عمران خان کی جانب سے لگائے گئے الزامات انتہائی سنجیدہ ہیں اور ان کا بھرپور جواب دیا جائے گا۔
کائرہ نے سپریم کورٹ سے مطالبہ کیا کہ وہ ان الزامات کی تحقیقات کرے اور اگر یہ جھوٹے ثابت ہوتے ہیں تو مناسب کارروائی کی جائے۔
آصف زرداری مجھے قتل کرنے کی سازش کر رہے ہیں، عمران خان
پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے الزام عائد کیا ہے کہ سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری ان چار افراد میں شامل تھے جو انہیں قتل کرنے کی منصوبہ بندی کر رہے تھے۔
ان خیالات کا اظہار انہوں نے ملک کی معاشی صورتحال کے حوالے سے پریس کانفرنس سے خطاب کرتے ہوئے کیا اور آنے والے دنوں میں مزید معاشی چیلنجز کی پیش گوئی کی۔
عمران خان نے پیپلز پارٹی کے شریک چیئرمین آصف علی زرداری پر قاتلانہ حملے میں ملوث ہونے کا الزام عائد کرتے ہوئے کہا کہ سابق صدر ان چار افراد میں شامل تھے جو انہیں قتل کرنے کی منصوبہ بندی کر رہے تھے۔