کراچی کے علاقے بلدیہ ٹاؤن میں 15 سالہ لڑکی کو 4 افراد نے مبینہ طور پر اغوا کرکے اجتماعی زیادتی کا نشانہ بنایا۔
15 سالہ متاثرہ لڑکی کو اس کی دادی کے گھر کے باہر سے اغوا کیا گیا تھا۔ بعد ازاں ملزم کی شناخت ساجد عرف جوجو کے نام سے ہوئی۔
بلدیہ ٹاؤن تھانے میں درج ایف آئی آر میں 15 سالہ متاثرہ لڑکی نے کہا کہ ساجد نے اسے اس کی دادی کے گھر کے باہر سے اغوا کیا اور نامعلوم مقام پر لے گیا۔
انہوں نے مزید کہا کہ مجرم نے اپنے تین دوستوں کے ساتھ مل کر اس کے ساتھ اجتماعی زیادتی کی اور اسے بے ہوشی کی حالت میں پھینکنے کے بعد فرار ہوگیا۔
طبی معائنے کے بعد پولیس سرجن نے گینگ ریپ کی تصدیق کی۔ پولیس نے متاثرہ لڑکی کا بیان ریکارڈ کرنے کے بعد ملزم کو گرفتار کرکے تفتیش شروع کردی۔
واضح رہے کہ گزشتہ ہفتے اوکاڑہ کے علاقے اکبر روڈ پر ایک شخص نے نوجوان خاتون کو گھر چھوڑنے کا جھانسہ دے کر مبینہ طور پر بندوق کی نوک پر زیادتی کا نشانہ بنایا تھا۔
ملزم کی شناخت اکرم کے نام سے ہوئی ہے جس نے لڑکی کو گھر چھوڑنے کی پیشکش کی لیکن بندوق کی نوک پر متاثرہ کو کھیت میں لے گیا اور اس کے ساتھ زیادتی کی۔
مجسٹریٹ کے حکم پر اوکاڑہ ڈسٹرکٹ اسپتال میں متاثرہ کا طبی معائنہ کیا گیا۔ دریں اثناء پولیس نے مقدمہ درج کرکے ملزم کی گرفتاری کے لئے چھاپے مارے ہیں۔