اسلام آباد(ڈیلی پاکستان آن لائن)وفاقی وزیر داخلہ رانا ثناء اللہ نے سابق وزیراعلیٰ پنجاب پرویز الٰہی کی گرفتاری کا عندیہ دے دیا۔
پریس کانفرنس سے خطاب کرتے ہوئے رانا ثناء اللہ نے سابق وزیراعلیٰ پنجاب پرویز الٰہی کی لیک ہونے والی آڈیو گفتگو چلائی جس میں وہ مبینہ طور پر عدالتوں کو سنبھالنے کی بات کر رہے تھے۔
رانا ثناء اللہ کا کہنا تھا کہ آڈیو گفتگو کے فرانزک آڈٹ کے بعد پرویز الٰہی کو گرفتار کرنے کے لیے وفاقی تحقیقاتی ادارے (ایف آئی اے) کو ہدایت کی ہے۔
انہوں نے مزید کہا کہ پہلی نظر میں پرویز الٰہی کو مقدمہ درج کرنے کے بعد گرفتار کیا جانا چاہیے۔ وزیر داخلہ کا کہنا تھا کہ ادارے کو وزارت قانون سے مشاورت کی ہدایت کی گئی ہے۔
انہوں نے کہا کہ سابق وزیراعلیٰ پنجاب بلا خوف و خطر ملک کی سپریم کورٹ کا انتظام سنبھال رہے ہیں۔ انہوں نے چیف جسٹس آف پاکستان سے مطالبہ کیا کہ وہ آڈیو گفتگو کا نوٹس لیں۔