لاہور:(پاک آنلائن نیوز) وزیراعظم شہباز شریف کی زیر صدارت مسلم لیگ (ن) کا مشاورتی اجلاس ہوا۔
مسلم لیگ (ن) کے مرکزی رہنما خواجہ سعد رفیق، اعظم نذیر تارڑ، ملک احمد اور عطاء اللہ تارڑ وزیراعظم شہباز شریف کی رہائش گاہ ماڈل ٹاؤن پہنچے۔
ذرائع کے مطابق وفاقی وزراء نے شرکاء کو پاکستان تحریک انصاف (پی ٹی آئی) کے وفد کے ساتھ ہونے والے مذاکرات کے بارے میں بریفنگ دی۔
اجلاس میں شرکاء نے مذاکرات کے تیسرے دور اور پی ٹی آئی قیادت کے مطالبات پر بھی تبادلہ خیال کیا۔
گزشتہ ہفتے پی ٹی آئی نے پنجاب اور خیبر پختونخوا (کے پی) کے انتخابات کے فریم ورک کے حوالے سے حکومت کے ساتھ آئین کے دائرے میں رہتے ہوئے مذاکرات جاری رکھنے کا فیصلہ کیا تھا۔
یہ فیصلہ پارٹی چیئرمین اور سابق وزیراعظم عمران خان کی زیر صدارت لاہور کے زمان پارک میں ان کی رہائش گاہ پر ہونے والے اجلاس میں کیا گیا۔
ملاقات میں شاہ محمود قریشی، فواد چوہدری اور سینیٹر علی ظفر پر مشتمل پی ٹی آئی مذاکراتی کمیٹی بھی موجود تھی۔
ذرائع نے اے آر وائی نیوز کو بتایا کہ مذاکراتی کمیٹی نے حکومتی وفد سے ہونے والی دو ملاقاتوں کی تفصیلات پیش کیں۔